എംപ്ലോയീസ് പ്രൊവിഡന്റ് ഫണ്ട് ഓർഗനൈസേഷന്റെ (EPFO) കീഴിലുള്ള നിർബന്ധിത സാമൂഹിക സുരക്ഷാ ആനുകൂല്യങ്ങൾക്കായുള്ള ശമ്പള പരിധി പ്രതിമാസം 15,000 രൂപയിൽ നിന്ന് 25,000 രൂപയായി ഉയർത്താൻ പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ ചേർന്ന കേന്ദ്ര മന്ത്രിസഭായോഗം അംഗീകാരം നൽകി. 2014-ന് ശേഷം ആദ്യമായി വരുത്തിയ ഈ നിർണ്ണായക മാറ്റത്തിലൂടെ 51 ലക്ഷത്തിലധികം പുതിയ ജീവനക്കാർ നിർബന്ധിത ഇ.പി.എഫ്.ഒ പരിധിക്ക് കീഴിൽ വരികയും, തൊഴിലാളികൾക്കുള്ള പ്രൊവിഡന്റ് ഫണ്ട്, പെൻഷൻ (EPS), ഇൻഷുറൻസ് (EDLI) തുടങ്ങിയ ആനുകൂല്യങ്ങളുടെ സുരക്ഷ കൂടുതൽ വ്യാപകമാവുകയും ചെയ്യും. രാജ്യത്തെ തൊഴിൽ മേഖലയുടെ ഔപചാരികവൽക്കരണം ശക്തിപ്പെടുത്തുന്നതിനും, വികസിത് ഭാരത്@2047 ലക്ഷ്യങ്ങളുടെ ഭാഗമായി ശക്തമായ വിരമിക്കൽ സുരക്ഷ ഉറപ്പാക്കുന്നതിനുമുള്ള സുപ്രധാന ചുവടുവെയ്പ്പായാണ് ഈ തീരുമാനം വിലയിരുത്തപ്പെടുന്നത്. ഇതിലൂടെ സർക്കാരിന് പ്രതിവർഷം ഏകദേശം 11,339 കോടി രൂപയുടെ ബാധ്യതയാണ് പ്രതീക്ഷിക്കുന്നത്.
Photo Courtesy - Google
